O xoves 22 de novembro realizamos o “I OBRADOIRO DE SOPRO DO BAYÓN” no que participaron os familiares dos nenos e nenas de 5º E.I, sendo  guiados polos alumnos e alumnas deste curso.

   Nos rapaces e rapazas menores de sete anos os exercicios de sopro ademais de axudar a controlar a respiración, axudan a adestrar os músculos que participan na fala. O obxectivo non é só que o rapaz ou rapaza aprenda a soprar, senón tamén que aprenda a controlalo e a modular ben a súa saída pola boca, acadando unha pronunciación voluntaria e consciente.

• Pásame a bola: por parellas e mediante o sopro, pasarse bolas de diferentes tamaños uns aos outros.
• Quen fai a pompa mais grande?: nunha mesa impregnada de auga con xabón, soprar por unha palliña ata formar pompas.
• Burbullas e máis burbullas: practicar as diferentes intensidades de sopro  empregando un vaso con auga e pallas de diferente lonxitude.
• Sopra e sopra ata chegar á meta: manter unha carreira de coches pequenos impulsados por sopridos ata chegar á meta.

   Agradecemos a participación tanto dos nenos e nenas que amosaron interese, responsabilidade e un comportamento inmellorable, coma aos familiares dos que nos sorprendeu e agradecemos enormemente:

• A asistencia, facendo un esforzo por estar na actividade e acompañar aos nenos e nenas que non tiñan familiares porque non lles foi posible acudir,sentimos non facelo nun horario no que puideran acudir todos e todas. Asegurámosvos que estiveron arroupados e pasárono moi ben. 
• A participación nos xogos e a ilusión transmitida aos rapaces e rapazas.
• A paciencia en cada actividade, a colaboración nas mesmas e ,sobre todo, o feito de manter un ambiente alegre e divertido durante todo o taller.

   Queremos amosar o noso agradecemento e alegría polo resultado do noso primeiro “Obradoiro de sopro” e garantir que fixemos autocrítica coa intención de aprender e corrixir  dos  erros cometidos.